බිත්තියක් බැඳීමේදී සැලකිලිමත් විය යුතු කාරණා 👨‍🏫

👷‍♂️ පළමු වරිය බැඳීමේදී එහි එලයිමන්ට් ගැන සැලකිලිමත් වෙන්න. ඒ කියන්නෙ කෙලින් බඳිනවද, ලෙවෙල් එක හරියට තියෙනවද, ලඹ තියෙනවද වගේ දේවල්. මොකද පළමු වරිය අනුව තමයි ඊළග වරි ටිකත් බැඳෙන්නෙ. ඒ නිසා මේ ගැන සැලකිලිමත් විය යුතුයි. 

බිත්තිය බැඳීමේදී ලඹ ගැනත් සැලකිලිමත් වෙන්න. මොකද යම් හෙයකින් බිත්තිය ඇද උනොත්, එහි පාඩුව ඔබට විවිධ ආකාරයෙන් ඇතිවෙන්න පුළුවන්.

හොඳම දේ, බිත්තිය බඳින්න කලින් බිත්තියෙ ලයින් එක ඕෆ්සෙට් එකක් විදියට ගහල තියාගන්න එක. මෙය මි.මි. 300, 500 වගේ දුරකින් ගහල තියාගන්න. එවිට බිත්තියෙ පළමු වරිය කෙලින් බැඳලද කියල අපිටම චෙක් කරගන්න පුළුවන් වේවි, ඒවගේම ලඹත් බලාගන්න පුළුවන්.

👷‍♂️ බිත්ති බඳින වැඩේ තාවකාලිකව නතර කරන අවස්ථාවකදි (දින දෙකකට වඩා) එකම ලෙවෙල් එකකින් බිත්ති නවත්තන්න පුළුවන් නම් හොඳයි. ඒ කියන්නෙ එකම තට්ටුවෙ එක පැත්තක බිත්තිය මීටර් 2ක් බැඳල නම්, අනිත් පැත්ත මීටර් 1ක් බැඳල නවත්තන්න එපා. ඒකත් මීටර් 2ක් ම බැඳල නවත්තන්න. මෙයින් අපිට බිල්ඩින් එකේ අසමතුලිත ගිලාබැසීම් (differential settlement) අඩු කරගන්න පුළුවන්. 

👷‍♂️ දිනකට බඳින බිත්තියෙ උස, මීටර් 1 ට වඩා වැඩි කරන්න එපා. මෙහිදී අපි බලාපොරොත්තු වෙන්නෙ දෛනිකව බඳින බිත්ති කොටස මඟින් එහි බදාම මත යෙදෙන බලය අවම කිරීම. එවිට බදාම තට්ටුව දුර්වල වීම අවම කරගත හැක.

👷‍♂️ බිත්තිය මීටර් 3 හෝ උපරිම මීටර් 4ට වඩා වැඩිනම්, ඒ බිත්තියට අමතර සපෝර්ට් එකක් ‍යෙදීමට අවශ්‍යයි. ඒ සඳහා ස්ටිෆිනර් (stiffener column) කොලම්, බීම් යොදාගත හැකියි.

👷‍♂️ බීම් උඩ/ස්ලැබ් වල වගේ බිත්ති බඳින්න පටන් ගන්නවනම්, ශටරිම ඉවත් කරපු ගමන් පටන් ගන්න එපා. තවත් සති 3ක් හෝ 4ක් ඉඳල පටන් ගන්න.

👷‍♂️ බිත්තියක් බැන්ඳම නියම විදියට නම්, බිත්තියත් දවස් 7ක් වත් කියොරින් කළ යුතුයි.

👷‍♂️ කොන්ක්‍රීට් මතුපිටක් උඩ බිත්ති බඳින්න කලින්, ඒ මතුපිට හොඳින් චිප් කරගන්න. ඒක, කොලම් වලටත් එහෙම තමයි. මෙහිදී බිත්තිය සහ කොන්ක්‍රීට් මතුපිට අතර හොඳ සම්බන්ධතාවක් ගොඩනැගීමට මෙය හේතුවෙනවා.

🕶 මෙහි මම සඳහන් කලේ බිත්තිය බැදීමේදී සැලකිලිමත් විය යුතු කරුණු කීපයක්. මෙහි සඳහන් කරල තියෙන සමහර දේවල් වැරදි ලෙස සිදුකිරීම ඔබේ මුදල් සහ කාලය අපතේ යැවීමකට හේතුවිය හැකියි. 

🕶 සැලකිලිමත් වන්න, දැනුවත්වන්න. එය ඔබේ කාලය සහ මුදල් රැකගැනීමට උපකාරී වේවි.

සටහන,✍✍✍

කල්ප මධුශංක

DR. Build®️